5 желтоқсан күні Өскемен қаласында өткен қалалық жәрмеңкеге Көкпекті ауданының ауыл шаруашылық тауар өндірушілері қатысты. Қолжетімді бағада ұсынылған жәрмеңкеде қала тұрғындары ет және балық өнімдерін сатып алу мүмкіндігіне ие болды.
Аудандық ауыл шаруашылық бөлімі ұсынған ақпаратқа сәйкес, жәрмеңкеге барлығы 2 тонна балық және 9 тоннаға жуық ет сатылымға қойылған. Оның ішінде сиыр, қой, жылқы және шошқа еті бар. Өнімнің бағасы нарықтық бағадан едәуір төмен болды. Мәселен, сиыр еті – 2 100 теңге, жылқы еті – 2 300 теңге, қой еті - 1 900 теңге.

Жәрмеңкеге ауданның барлық 17 ауылдық округі өнімдердің көптеген түрін алып барды.
Сауда шарасына келушілер ет пен балықтан басқа көкөністер, сүт өнімдерін, тұздалған азық қорын, сонымен қатар сары май, ірімшік тағамдарын сатып алды.
«Алтай балы» ЖК басшысы Рустам Мухамадиев өзінің бал өнімдерін жәрмеңкеде ұсынды.
Жәрмеңке қала тұрғындарының қыс қамын жасап алу үшін үлкен мүмкіндік болды. Көпшілік жәрмеңкеге дән риза.

Пікір: