Көкпекті ауылында жеке кәсібін ашып, еңбек етіп отырған жас кәсіпкер, Елбасымыздың «Болашаққа бағдар-рухани жаңғыру» атты мақаласында айтылған «Қазақстандағы 100 жаңа есім» жобасына есімі енген жерлесіміз. Ол - он саусағынан өнері тамған Жанна Жабекова. Оның тігін цехында аудан әкімі Асхат Сайдахметұлы Смаилов болды.
Жаны нәзік Жанна жұмсақ ойыншықтар жасайтын тігін цехын ашып еңбек еткеніне 2 жылдай уақыт болды. Тағдыр сынына мойымаған ол - қолөнер шебері. Қолдан жасалған бұйымдар қазір сәнді болып тұрғандықтан, оның өнімдеріне сұраныс жоғары. Жанна жеке кәсіпкер ретінде тіркеліп, заңды түрде ісін жүргізуде. Ол басынан өткерген қиындықтарға қарамай, шығармашылық ізденіспен құлшына еңбек етуде.

Тігін цехына ат басын бұрған аудан басшысын қарсы алған Жаннаның ата-анасы, қыздарының жасаған бұйымдары мен жетістіктерін таныстырып өтті. Жас шебердің еңбегіне риза болған Асхат Сайдахметұлы оған өзінің тілегін білдірді.
- Құрметті Жанна тағдыр салған тауқыметке қарамастан, жарқын болашаққа деген ұмтылысыңыз, ауданның кәсіпкерлік саласына қосып жатқан үлесіңіз елдің де, қоғамның да, биліктің де назарында. Сіздей жандарды батыр деп те айтуға болады. Өйткені, сіздер өмірге деген мұқалмас жігерлеріңіз бен қажымас қайраттарыңыз өзгелерге үлгі. Осындай қажымас еңбегіңіз үшін алғысымды айтамын. Табиғат сыйлаған нәзіктік, әдемілік, сезімталдық деген жақсы қасиеттер бойыңыздан табылсын, - деді аудан басшысы.
Сонымен қатар, Асхат Сайдахметұлы Жаннаның өнеріне оң бағасын бере келе, оған «Балалар өнер мектебі» оқушыларына дәріс беру жағын да тілге тиек етті. Бұл тапсырманың орындалуын орынбасары Дәурен Қойгелдинге жүктеді.
Он екі мүшесі сау бола тұра тағдырына разы емес көпшілік үшін Жаннаның өмір жолы үлгі боларлықтай. Ешкімге тіленбей, адал еңбегінің арқасында табысқа қол жеткізіп отырған оның армандары да асқақ.

Клара ҚАЙЫПЖАНҚЫЗЫ

Пікір: