1991 жылдың 1 қазанында Біріккен Ұлттар Ұйымының Бас ассамблея шешіміне сәйкес жыл сайын Халықаралық қарттар күні өтіледі. Қай заманда болмасын қоғамда қарияларға деген құрмет, ізет-ілтипат ерекше болған, олардың даналықтары мен өмірден түйген мол тәжірибесіне ден қойып отырған.
Қарттарға қамқорлық – біздің халқымыздың санасына терең сіңген қасиет. Ардагерлер – еліміздің алтын қоры. Олар бүкіл саналы ғұмырын, қажыр-қайратын ел игілігіне, ұрпақ тәрбиесіне жұмсады. Кейінгі буын да өз кезегінде алдыңғы толқын ағалардың салған сара жолын лайықты жалғастырып келеді. Елбасы Нұрсұлтан Әбішұлы Назарбаев әрбір ардагердің, әрбір қарттың қажеттіліктерін ескеру,оларға қамқорлық жасау – біздің басты борышымыз екендігін ескертіп, ерекше мән берді.

Біздің аудан көлемінде де «Нұр Отан» партиясының «Ардагерлерді ардақтайық» атты айлық аясында 1 қазаннан – қараша айының аралығында өтіп жатқан бір айлық өткізіліп, нәтижесі бойынша қорытынды жасалуда. Көкпекті және Самар аудандық орталық ауруханаларында «Ашық есік» күні өткізіліп, қарт адамдардың денсаулығы тексерілді. Елді мекендердегі емхана, медициналық пункттерде егде тартқан адамдар үшін кеңес беру пункттері жұмыс жасады. Барлығы 94 адам қаралып, 12 қарияға денсаулығын түзету үшін санкурорттық мекемелерге жолдама берілді. 80 адамға жеңілдікпен тегін дәрі-дәрмек берілді.
37 адам «Жұлдыз»- «Новая жизнь» газетіне жеңілдікпен жазылды. 21 адамға коммуналдық қызмет көрсету тегін жүргізілді. Аудандық мәдениет және тілдерді дамыту бөлімінің басшылығымен онлайн режимінде 7 концерт көрсетілді. Дойбы және шахмат ойнаудан 2 рет сайыс өткізілді. Білім мекемелерінде (52 мектеп және 4 балабақшада) «Қарттарын қадірлеген ел - ардақты» атты апталықтар ұйымдастырылды.
Қариялар үшін 4 рет қайырымдылық жәрмеңкелері өтті. Онда азық-түлік төмен бағада сатылды. Сонымен қатар 840 кг ет, 200 литр май, 914 тонна шөп, 23 тонна жем тегін берілді. 172 тонна көмір, 190 куб жанба отын таратылды. 6 қарияның тұрғын үйіне күрделі жөндеу жұмысы жүргізілді. 52 адамға 260 мың теңгеге қаржылай көмек көрсетілді. Мекеме басшылары мен шаруа қожалықтарының ұйымдастыруымен егде тартқан 1456 зейнеткерге азық-түлік пакеттері таратылды. Көмек көрсеткен мекемелер: «Көкпекті-Несие» (А.Оспанов), кәсіпкерлер палатасы(Б.Артыкпаев), Балалар өнер мектебі (А.Сүлейменов), Фитосанитария (Д.Байсеңгіров),Түзету орталығы (Ш.Мадиева), ЖК «Виничук» (В.Виничук).
Көкпекті аудандық Жастар орталығымен (Ә.Артықпаев) бірлесе отырып, 85 қайырымдылық сенбіліктері өткізілді. Бұл сенбіліктерде жалғыз басты 25 қарияның бақшаларындағы өнімдері жиналды. 85 қарияның үйіне, қора-қопсысына ағымдағы жөндеу жұмыстары жүргізілді. Қысқы мерзімге отындары даярланды.
Жалпы көрсетілген материалдық көмек 2378 адамды қамтыды. Қаражылай есептегенде 10 млн.371 мың 400 теңгені құрады.
«Қарты бар үйдің - қазынасы бар» деп дана халқымыз айтқандай, үйінде қариясы бар отбасы - шынында да,қазыналы,берекелі жанұя.
- Біз, сіздердің балаларыңыз бен немерелеріңіз, тәлімді тәрбие, сапалы білім беріп өсіріп, тәрбиелегендеріңіз үшін, өмірдің небір қиындықтарын қайыспай жеңе білуге және жеңістерге шаттана білуге үйреткендеріңіз үшін шексіз ризамыз. «Ардагерлерді ардақтайық» атты айлықты ұйымдастырушыларға зор алғысымызды білдіреміз. Ендігі жерде перзенттік парызымыз - тек мерекелерде ғана емес, сіздерді әр күні қамқорлыққа алып, көмек көрсету.
Осы айлық барысында «әттеген-ай» - деп, көзіміздің жеткені аудандағы кейбір мекеме, бөлім басшылары, ауыл әкімдері қарттарды құттықтауды қойып, тіпті өздерінің ұжымынан шыққан зейнеткерлердің нақты тізімін де білмей отыр. Зейнеткер ата-апаларымыздың өкпе-реніші осы жауапсыздыққа тіреліп отыр.

Р.Наурызбаева,
Ардагерлер кеңесінің хатшысы

Пікір: