Ауған соғысы жауынгерлерінің спорт алаңында аудандық ардагерлер кеңесінің бастамасымен, дене шынықтыру және спорт бөлімінің ұйымдастырумен зейнеттегі ардагерлер  арасында шаңғыдан жарыс өтті. Жарысқа қатысушы ардагер спортшылар спорттық құлшыныстарын көрсетіп, салауатты өмір салтын насихаттауға өз үлестерін қосты.

Ел Тәуелсіздігінің 30 жылдығына арналған спорттық шараның ашылу салтанатына дене шынықтыру және спорт бөлімінің басшысы Ержан Кәрібаев, бас маман С.Теміржанов, аудандық ардагерлер кеңесінің төрағасы С.Мукашев, спорт ардагерлері қатысты. Ауған соғысы жауынгерлерінің спорт алаңында өткен бұл жарыс ардагерлер мен жас ұрпақты салауатты өмір салтын насихаттау, шаңғы спортымен айналысуға шақыру мақсатын көздеді. Жалпы жарысқа 10-ға тарта адам қатысып, қатысушылар 1 шақырым қашықтықта сынға түсті.

Жарыстың ашылу салтанатында сөз алған ардагерлер кеңесінің төрағасы Слямбек Насырбайұлы мен спорт саласының ардагері, еркін күрес бойынша тренер Г.Самохин өздерінің жүрекжарды игі тілектерін жеткізіп, ақ баталарын берді.
Айта кетейік, ардагерлер арасындағы шаңғы жарысына Қ.Тыныбаев, С.Тлебалдин, Б.Бабаев, Т.Жұмақанов, Б.Сембинов, С.Файзуллин, Қ.Азин, Г.Самохин қатысты.
Жарысқа қатысушылардың көңілінен шыққан шара өз мақсатына жетті. 63-69 жас арасында Қ.Тыныбаев 1-орынды иеленсе, ІІ және ІІІ орынды С.Тлебалдин, Т.Жұмақанов өзара бөлісті. 70 жастан жоғарғы ардагер спортшылар арасынан І жүлделі орынды Б.Бабаев жеңіп алса, ІІ орынды Б.Сембинов, ІІІ орынды С.Файзуллин иеленді.
- Бүгінгі қысқы спорт түрі шаңғыдан өткен жарысты ұйымдастырушыларға алғыс білдіреміз. Баршаңыз бүгінгі ойында жақсы нәтиже көрсеттіңіздер деп ойлаймын. Осындай спорттық жарыстар өткізу арқылы келешек ұрпаққа салауатты өмір салтын насихаттауға болады. Барлықтарыңызға денсаулық, отбасыларына амандық тілеймін, – деді ардагер Болатбек Бабаев.
Жарыс соңында жеңіс тұғырынан көрінген жүлдегерлер аудандық дене шынықтыру және спорт бөлімінің алғыс хатымен және бағалы сыйлықтарымен марапатталды.

Пікір: