Көкпекті ауданының жас-тары Ұлы Отан Соғысының ардагері Сағидолла Ағзамовтың рухына тағзым етті. Жыл сайын Жеңіс күні мерекесінің қарсаңында ардагер ұрпақтары дәстүрлі түрде өткізіп келе жатқан волейбол турнирі биыл Самар ауылында жалауын көтерді. Ардагердің ұлағатты есімін абыроймен алып жүрген ұрпақтары Мұхамедолла және Ерік Ағзамовтар жарысқа арнайы келіп, қомақты жүлде қорын тағайындады.
Осымен 33 жыл қатарынан үздіксіз өткізіліп отырған турнирге спортшылардың дайындығы да мықты. 5 мамыр күні Самар ауылының 2 бірдей спортзалында 8 құрама күнұзаққа тартысты ойындар өткізді. Көкпекті, Миролюбовка, Үлгілімалшы, Қарағандыкөл, Көкжайық, Аққала ауылдарының құрамаларымен бірге алаң иелері Самар ауылының 2 құрамасы турнир жүлдесін сарапқа салды.

Жыл сайынғы дәстүрлі жарыстың фавориті саналған Самар мен Қарағандыкөл ауылының жігіттері өз топтарында қарсылас шақ келтірмеді. Аққала мен Көкпекті волейболшылары топтағы екінші орынмен финалдық ойындарға жолдама алды. Алаңдағы жастар арасынан мол тәжірибесі және шындалған шеберлігі арқылы ерекшеленіп тұрған спорт ардагері Амантай Байтолықов ұйымдастырушылардың арнайы жүлдесіне ие болды. Дәл осы Амантай аға жаттықтыратын Көкпекті құрамасы ІІІ орынға табан тіреді. Көпшілікті ойынымен тәнті еткен көкпектілік Ерасыл Мұқашев көрермен көзайымы, үздік шабуылшы Д.Мусин, үздік қорғаушы Арман Зайнутдинов және үздік ойын ұйымдастырушы атағына Александр Жуков лайықты деп танылды.
Ақтық сында Самар ауылының құрамасын женген Қарағандыкөл волейболшылары турнир жеңімпаздары атанды. Алаң иелері ІІ орынды місе тұтты. Турнир жеңімпаздары мен жүлдегерлері мадақтама қағаздарымен және қаржылай сыйлықтармен марапатталды. Ұлы Отан соғысының ардагері Сағидолла Ағзамов есімі жерлестер жадында мәңгілік жаңғырып тұрары анық.

Пікір: