7 мамыр Қазақстан Республикасының Отан қорғаушылар күніне арналған «Жас қыран» әскери-патриоттық ойындары болып өтті. Әскери патриоттық сайыс 5-7 сыныптар арасында өткізілді.
«Жас қыран» әскери-патриоттық ойынның ашылу салтанатына аудан әкімінің орынбасары М.Теміржанов, аудандық қорғаныс істері бөлімі басшысының м.а. Д.Дужанов, білім беру бөлімінің басшысы Ш.Мұстафинова қатысты.
Әскери ойынға Көкпекті ауданы ауылдарынан барлығы 7 команда келді. Ойын барысында АӘД оқытушысы Н.Құнанбаев жарысқа қатысу-шыларды бір сапқа тұрғызды. Патриоттық шара барысында туға түзелу пәрмені беріліп, мемлекеттік Әнұран шырқалды.
Қатысушылар Ж.Шайжүнісов мектебінің алаңында сап түзеп, бөлімше командирлері баянат берді. Жарыстың бірінші кезеңі яғни сап түзеу және ән байқауында қатысушылар ұжымдық іс-әрекеттер бөлімше құрамындағы үйлесімділік бөлімшенің сапқа тұруы, сыртқы көрінісі, бөлімше командирінің әділқазы алқасына баяндамасы, саптық жаттығулар, бір-екі-үш қатарға сапқа тұру, орынындағы бұрылыстар, әнмен жүріп өту, әділқазылар алқасына салтанатты түзеліп өту жаттығуларын көрсетті. Одан кейінгі кезеңде жас қырандар пневматикалық винтовкадан оқ атып сайысты.

Отан қорғаушылар күніне арналған салтанатты шарада аудан әкімінің орынбасары Марат Қапарұлына құттықтау кезегі сөз берілді
- Қадірменді қауым! Сіздерді мемлекеттік мереке – Отан қорғаушылар күнімен құттықтаймын! «Отан қорғаушылар күні» бұл аса абыройлы, ұлық күндеріміздің бірі. Еліміз өз тәуелсіздігін алғаннан кейін, елдің, азат ойымен өткен тарихы мен тағдырын таразылап, жаңаша бүгінгі заман талабына сай баға берді. Соның нәтижесінде Ұлттық Отан қорғаушылар күні өмірге келді. Бұл қазақ тарихының жаңа бір белесі, Қазақ Елінің өзін өзі басқаруының, өзін-өзі қорғай алатындығының, күш-қуатының көрінісі. Сіздердің әрқайсыларыңыз - өз Отаныңыздың, өз отбасыңыздың, өз шаңырағыңыздың қорғаушысысыздар. Шын жүректен ашық аспан, денсаулық, батылдық пен қайсарлық тілеймін!
Мұнан соң аудандық қорғаныс бөлімі басшысының орынбасары Д.Дужанов сөз алып, құрметті қонақтар мен жас сарбаздарды Қазақстан Республикасының Отан қорғаушылар күні мерекесімен құттықтады.
Байқау соңында әділқазылар алқасы қатысушыларды мерекелерімен құттықтап, ойында көзге түскен командаларды атап өтті. Сонымен ойын қорытындысы бойынша І орынды Көкжота орта мектебі, ІІ орынды Үлкенбөкен мектеп-балабақша кешені, ІІІ Шәріптоғай командасы жеңіп алды. «Үздік бөлімше командирі» аталымын Үлкенбөкендік Әли Оралғазин, «Үздік атқыш» болып Казнаковка ОМ Жәнібек Әділбеков анықталды.
Отан қорғаушылар күні ер-азаматтардың ғана емес жалпыхалықтық мереке. Ал, еліміздің тыныштығы мен бейбіт өмірінің күзетінде тұрған әскери қызметкерлер мен сарбаздардың Отан қорғаудағы үлесі орасан зор екені айтпаса да түсінікті. Олай болса, Ұлы даламыздың шебі бүтін, шекарасы берік болғай! Әр азаматтың өз елінің, Отаны алдында парызы болады. Ол Отан алдындағы парызын өтеу. Халқымызда «Ерім дейтін ел болмаса, елім дейтін ер қайдан болады» деген мақал бар. Болашақ жастар өз Отанының нағыз патриоты бола алу қажет.

Пікір: