Өткен жексенбіде тұрғындар арасында салауатты өмір салтын қалыптастыру, қысқы спорт түрлерін, оның ішінде ауылдық округтерде шаңғы спортын дамыту мақсатында шаңғы тебуден жарыс өткізілді. Қысқы Универсиада-2017-нің құрметіне ұйымдастырылған бұл шараға ауылдық округтердегі мемлекеттік қызметкерлерден құрылған командалар, аудандық төтенше жағдайлар, жұмыспен қамту және әлеуметтік бағдарламалар, ішкі саясат бөлімдерінен қызметкерлер қатысты. Қатысушылар жас ерекшеліктеріне қарай, 18-60 жастан асқан азаматтардан ерлер мен әйелдерге бөлінді. Әр қатысушының жеке нөмірі мен өз шаңғысы болғандықтан, жеңімпазды анықтау қиын емес еді.
Шаңғы тебу жарысында команданың намысы үшін бар өнерін салған спортшылар арасынан көз ілеспес жылдамдығымен, жүйріктігімен озып шыққан Көкпекті ауылдық округі командасы І-орын, Теректі ауылы ІІ-орын, ал Қ.Аухадиев атындағы округ командасы ІІІ-орынды қанжығалады.

Әділқазылар алқасының шешімі бойынша жарыс жеңімпаздары мен қатысушылар жеке мақтау грамоталарына ие болса, онымен қоса жүлдегерлерге Астанада өтетін ЭXPO көрмесіне Аудандық білім, дене шынықтыру және спорт бөлімінен арнайы тағайындалған тегін билеттер сыйға тартылды. Айта кетсек, көкпектіліктер – 4, теректіліктер – 3, преображенкалықтар – 2 билетке ие болды Шаңғышыларымызға сәттілік тілейміз!
Аудандағы қысқы спорт түрлерін дамытудың әлі де кемшін тұстары да, оған кедергі болатын себеп-салдарлардың да бар екені баршамызға белгілі. Алайда, «көш жүре түзеледі» деген нақыл сөзге иек артамыз. Қысы ұзақ болатын біздің аймақта қысқы спортты алға жылжыту - өскелең ұрпақтың денсаулығы мықты болып қалыптасуына қомақты үлес қосары анық.

Бақыт МҮЛІКОВА

Пікір: