Көршілес жатқан екі ауданның халқы аралас-құралас экономикалық, мәдени, кәсіпкерлік салалары бойынша ежелден тығыз байланыста. Көкпекті мен Тарбағатай аудандары арасындағы осы достық бүгінгі күні өз жалғасын тауып, қайырымдылық шарада айқын көрініс тапты.

Тарбағатайлық кәсіпкер Қайрат Қожахметов елімізде жарияланған төтенше жағдайға байланысты Көкпекті ауданының тұрғындарына көмек ретінде 2.5 тонна ұн жіберді. «Бай болсаң халқыңа пайдаң тисін» деген Әйтеке бидің нақыл сөзін ту еткен жомарт азаматтың көмегі арнайы құрылған комиссия шешімімен мұқтаж жандарға әділ таратылатын болады. «Бота» ЖШС басшысы жолдаған көмек қоры 29 сәуір күні ауданға жеткізіліп, қоймаға түсірілді. Аудан әкімінің орынбасары Марат Теміржанов кәсіпкердің өкіліне «Алғыс хат» табыстап, аудан әкімі атынан шынайы ризашылық білдірді.

Айта кетейік, «Бота» ЖСШ құрылтайшысы Қайрат Қабдешұлы облысымызға белгілі спорт меценаты. Кәсіпкердің жеке ұйымдастырылуымен құрылған «Жігер» волейбол клубы облыстық жарыстардың жүлдегері. Мемлекеттік – жекеменшік әріптестік аясында өз қаражатына Бозша және Қамысты ауылдарына көпір салып бергенін тарбағатайлықтар бүгінде мақтанышпен айтып жүреді.
Ежелден ауылы аралас, қойы қоралас Көкпекті мен Тарбағатай аудандарының достық қарым-қатынасы көпке үлгі. Екі ауданға ортақ аталатын ұлт тарихындағы ұлы тұлға Тана Мырза Тілемісұлының ізін жалғаған текті ұрпақтары елдіктің белгісін көрсетіп, мызғымас бірлігін осылай айшықтауда.

Дархан БЕРДІБЕК

Пікір: