19 мамыр күні Шығыс Қазақстан облысының әкімі Даниал Ахметов жұмыс сапарымен Көкпекті ауданына келді. Аймақ басшысы аудандық мәдениет үйінде тұрғындармен кездесу өткізіп, оқушылар шығармашылық сарайының ашылу салтанатына қатысты.

Қалихан Алтынбаев атындағы мәдениет үйінде өткен кездесуге ардагерлер, мемлекеттік қызметкерлер, мәслихат депутаттары, ауылдық округ әкімдері, қоғам белсенділері және зиялы қауым өкілдері жиналды. Бірінші сөз алған Көкпекті ауданының әкімі Раджан Сейтқанов аудан көлемінде жүзеге асырылған жобалар мен атқарылып жатқан жұмыстарға кеңінен тоқталып өтті.

- Мемлекет басшысы Қасым Жомарт Кемелұлы Тоқаевтың 16 наурыздағы «Жаңа Қазақстан: жаңару мен жаңғыру жолы» атты Қазақстан халқына арналған Жолдауын іске асыруға бағытталған ауқымды шаралар Көкпекті ауданының жан-жақты дамуына зор мүмкіндік туғызады. Басты мақсатымыз ауданның әлеуметтік-экономикалық жағдайын дамыту және тұрақтандыру. Алға қойылған барлық мақсаттар мен міндеттерді, ауқымды жоспарлар мен ұтымды жобаларды жүзеге асырамыз деп сенемін, - деді Раджан Қайрқанұлы.
Ауданда атқарылып жатқан жүйелі жұмыстарға оң бағасын берген Даниал Кенжетайұлы көкпектіліктерді облыс көлемінде атқарылып жатқан ауқымды шаруалармен таныстырды.
- Біз егемен елде, тамаша жерде тұрамыз. Бізде барлығы бар. Бастысы бірлік керек. 5 маусымда өтетін референдумға барып, жаңа өзгерістерді қабылдайық. Көкпекті ауданының тұрғындары саяси-қоғамдық мәселелерге үнемі үлкен жауапкершілікпен қарайды. Референдумға барлық тұрғындар қатысады деген үлкен сенімім бар, - деді аймақ басшысы.
Әр сөзін нақты деректермен сабақтаған аймақ басшысы халықты алаңдатқан негізгі мәселелерді қамтыды. Сөз соңын «Әрбір азамат еліміздегі бейбітшілік пен ұлтаралық келісімді көзінің қарашығындай сақтап, «Жаңа Қазақстанды» құру жолында аянбай еңбек етуі керек» деп түйіндеді.
Аймақ басшысы Көкпекті халқының көптен күткен үлкен қуанышымен бөлісті. Бұл күні аудан орталығында күрделі жөндеуден кейін оқушылар шығармашылық сарайы ашылды. Заманауи үлгідегі сәулетті, көздің жауын алатын көркем ғимарат жас ұрпақ игілігіне қызмет ететін болады. Сондай-ақ бұрынғы Құмар Раев атындағы балалар үйінің күрделі жөндеуден өткен ғимаратында аудандық кітапхана, бірнеше дербес бөлімдер орналасқан.
- Көкпекті ауданының дарынды балалары тамаша ғимаратта, барлық жабдықтары қамтылған сыныптарда білім алып, сүйікті өнерімен айналысуға мүмкіндік алды. Бүгінгі күні түрлі бағыттағы 53 үйірмеде 840 оқушы қамтылып отыр. Музыка-эстетикалық, бейнелеу өнері, әлеуметтік-педагогикалық, технологиялық, спорттық және өлкетану бағыттарында үйірмелер жұмысы ұйымдастырылды, - деп таныстырды оқушылар шығармашылық сарайының директоры Асқар Сүлейменов.
Ардагер ұстаз Амантай Нұрғалиев өнерлі өрендерге ақ батасын беріп, ақ жол тіледі. Салтанатты лента қию рәсімін елімізге ардақты, көкпектіліктерге сыйлы ардагерлер Амантай Нұрғалиев және Галина Орсаева жасады. Ақ әжелер шашу шашып, балғын домбырашылар шаттық күйін күмбірлетті.
Ғимарат тарихын жас ұрпақ тарихында сақтау, туған өлке шежіресін жаңғырту мақсатында шығармашылық сарайында мұражай ашылған. Балалар үйінде ұлы ұстаз Жақия Шайжүнісовтың тәрбиесін көрген шәкірті, балалар үйінің директоры болған ардагер ұстаз Галина Орсаева құрметті қонақтарға мұражай жәдігерлерін таныстырды.
Аймақ басшысы ғимаратта жүргізілген күрделі жөндеу жұмысының сапасына өте жоғары баға беріп, аз қаражат жұмсай отырып, үлкен шаруа тындырылғанын ерекше атап өтті. Бұл бағаның әділдігіне аудандық кітапхана орналасқан ғимарат бөлігіне бір рет қана көз жүгірткен адам сөзсіз сенеді. Соңғы 30 жылда тұрақты ғимаратқа орналаса алмай, кемінде 10 рет көшірілген кітапхана заманауи үлгіде жабдықталған бөлмелерге орналасуы барша көкпектіліктер үшін қуанышты жаңалық болды.
Жұмыс сапарының соңында Даниал Кенжетайұлы дарынды оқушылармен естелік фотосуретке түсті. Ал өз кезегінде жас жеткіншектер аймақ басшысына алғыс айтып, ауданымызға тағы келіңіз деп шақырды.

Дархан БЕРДІБЕК

Пікір: