"Өңірлерді дамыту 2020-2025" мемлекеттік бағдарламасының арқасында ауылдық аумақтарды абаттандыру, инфрақұрылымды жақсарту бойынша кешенді шаралар атқарылуда. Қайыңды халқын мазалаған жаңа көпір салу жұмыстары сәтті аяқталып, тұрғындарға қуаныш сыйлады.

Қайыңды ауылын екіге бөліп ағып жатқан өзенге жаңа көпір салынып, пайдалануға берілді. Көпір салу бүгінгі күнге дейін ауыл тұрғындарының түйткілді мәселесіне айналған еді. 50 жыл бұрын қаланған көпір аласа болып, мұз қата берген соң, 1980 жылдары қайта бетон құйып, биіктетіп жөндеген. Жарты ғасырға жуық уақыт өткеннен кейін көпірдің материалдары шіріп кеткен. Тіпті, көліктер өте алмайтындай күйге түскен. Соңғы бірнеше жылда ауыл тұрғындарынан «ауылға көпір керек» деген ұсыныс жиі айтылды.

Мәселе төңірегінде аудан басшылығының қадағалауымен көпір салуға жергілікті бюджеттен қаражат бөлінді. Құрылыс барысында  жеке кәсіпкер Самарқан Қалисатарұлы көпір салу үшін барлық қажетті техникаларын беріп, күш-жігерін аямай өзі де іске кірісті.

Көпірдің ұзындығы - 11 метр, ені - 4,60 метр. Сонымен қоса, көпірдің жанына жаяу жүргіншілерге арналған жол салынған. Осылай тұрғындар бір жағадан бас, бір жеңнен қол шығара отырып еткен еңбектің жемісін көрді.

Көпірдің салтанатты ашылуына аудан әкімі Серікқазы Садуақасов, аудан әкімінің орынбасары   Дәурен Қойгелдин, аудандық мәслихат хатшысы Талғат Сарманов, маслихат депутаты Самарқан Жотабаев, ауылдық округ әкімі Ахмет Күдербаев және  Қайыңды ауылының тұрғындары қатысты.

Пікір: