Көкпекті халқы асыға күткен Спорт кешенінің құрылысы аяқталып, ел игілігіне берілетін күн де алыс емес. Осы орайда аудан әкімі Серікқазы Садуақасов жуық арада қолданысқа берілетін спорттық нысанда болып, «DK Proekt» мердігер ұйымының өкілімен кездесті.

«Ауыл - ел бесігі» жобасының аясында жүзеге асырылған жоба қараша айында қолданысқа берілмек. Бұл жоспармен кешенді аралау барысында аудан басшысы Серікқазы Құсайынұлы бөлісті. Нысанмен танысу барысына мердігер ұйым өкілі Болат Бекенов, құрылыс бөлімінің басшысы Талант Бақытбекұлы, спорт бөлімінің басшысы Ержан Кәрібаев, балалар және жасөспірімдер спорт мектебінің директоры Аслан Танысбаев қатысты.

Аудан орталығында заманауи дене шынықтыру - сауықтыру кешенін салу жобасы 2019 жылдың тамыз айынан басталды. Бұл мақсатта «Ауыл - ел бесігі» жобасы арқылы 703,465 миллион теңге бюджет қаражаты бөлінген. Қаржыландыру көзінің 90 пайызы республикалық бюджет болса, 10 па-йызын облыс бюджеті құрайды. Мемлекеттік сатып алу үрдісінің нәтижесі бойынша «DK Proekt» құрылыс компаниясы жеңімпаз болып танылды. 2019-2020 жылдарға жоспарланған жобаны қолданысқа беру мерзімі - ағымдағы жылдың қазан айы.
Заманауи үлгіде салынған кешеннің аумағы - 4,1 гектар. Кешен аумағында 30х20 мөлшерлі спорт залы қазіргі уақытта спорттық жабдықтармен толық қамтылған. Сондай-ақ, бокс үйірмесі залы жасақталды. Аумақта балалар ойын алаңы мен воркаут кешені, волейбол, баскетбол және үлкен теннис алаңдары орналасқан. Халықаралық стандартқа сай үлкен футбол алаңының жасанды жабындысы алыстан көз тартады. Жасыл алаңның сыртында 8 жолақты жеңіл атлетика жолы бар. Оған да жеңіл атлетикамен кәсіби айналусуға арналған жабынды төселіпті. Ұзындыққа секіру аймағы да қарастырылған. Сондай-ақ жасыл алаңдағы қызықты ойындарды тамашалауға келетін көрермендерге 478 орындық трибуна орнатылған.
Тендессіз кешенді толық аралап шыққан аудан басшысы Серікқазы Құсайынұлы жобаның жүзеге асырылу барысына көңілі толатынын жеткізді. Алайда, мердігер ұйым өкілі Болат Бекенұлына нысанды тапсыруға дайындық жұмыстарының барсында кейбір ұсақ кемшіліктерді жою қажеттілігі ескертілді.
«Элеватор» аумағында салынып жатқан әлеуметтік тұрғын үй құрылысы да үнемі аудан басшысының жіті бақылауында. Көпбалалы және азқамтылған отбасыларға арналған 20 екі пәтерлі жеке тұрғын үйлердің құрылысы жыл соңына дейін аяқталады деп күтілуде. «Жол картасы - 2020» бағдарламасымен жүзеге асатын жоба - аудандағы баспана мәселесін шешуге жасалған үлкен бетбұрыс.
«СК KazAlem» мердігер ұйым өкілімен кездес-кен аудан әкімі Серікқазы Садуақасов жұмыстың баяу жүріп жатқанына алаңдаушылық білдірді. Салынып жатқан тұрғын үйлердің көшесіне тас төсеу қажеттігі ескертілді. Құрылыс бөлімінің басшысына нысанды уақытында аяқтау бойынша жұмыс жүргізу жүктелді.

Пікір: