9 мамыр – Жеңіс күні. Еліміз үшін қасиетті де қастерлі мереке биыл ерекше маңызға ие - Ұлы Отан соғысындағы Жеңістің 75 жылдық мерейтойы. Атаулы мерекені бүкіл әлем халқы қауіпті індет таралуы салдарынан толық деңгейде атап өте алмауда. Алайда, бұл біздің Ұлы Жеңіс сыйлаған жеңімпаз жауынгерлерге деген құрметімізді ө

Әлемге бейбітшілік пен жасампаздық сыйлаған Ұлы Жеңістің 75 жылдық мерейтойын Көкпекті халқымен бірге 3 соғыс ардагері Елеусіз Қиынбаев, Валентина Федосова және Мүталап Ықыласов қарсы алды. Мереке күні аудан басшылығы ардагерлердің үйіне барып, Жеңіс күнімен құттықтап, құрмет көрсетті. Қазақстан Президенті Қасым-Жомарт Тоқаевтың құттықтау хатын табыстай отырып, аудан әкімі Асхат Смаилов майдангерлерге мызғымас денсаулық, ұзақ ғұмыр тіледі. Құттықтау хатта: «Сізді Ұлы Отан соғысындағы Жеңістің 75 жылдығымен шын жүректен құттықтаймын! Сіздердің адамзат тарихындағы ерен ерліктеріңіз бүгінгі бейбіт өмірімізге, жарқын болашағымызға жол ашты. Бұл ешқашан ұмытылмайды. Ардагерлеріміздің даңқты өмір жолы - Отанға қызмет етудің және патриотизмнің озық үлгісі, өскелең ұрпақ әрдайым өздеріңізге қарап бой түзейді. Сізге зор денсаулық, амандық және бақ-береке тілеймін», - делінген.

Сондай-ақ, облыс әкімі Даниал Ахметовтың ақжолтай лебізі жазылған құттықтау хат, «Нұр Отан» партиясы атынан арнайы белгі сағат, аудан әкімінің бағалы сыйлығы және «Көкпекті Несие» бірлестігінің 100 мың теңге қаржылай сыйлығы табысталды.
- Әр сарбаздың жанқияр ерлігімен, қанымен, жанымен келген бейбіт күнді бүгінгі тыныш өмір кешкен ұрпақ мәңгілік есте сақтайды. Ардагер аталарымыз бен апаларымыз жасаған өшпес ерлік әрқашан жадымызда, - деді Асхат Сайдахметұлы.
Өз кезегінде ардагерлер Мемлекет басшысына үнемі көрсетіп отырған қамқорлығы мен қолдауы үшін зор ризашылығын білдірді. 95 жасқа келсе де әлі тың, сергек қалпымен көпке қуаныш сыйлап жүрген соғыс ардагері Елеусіз Қиынбаев өзіне көрсетілген зор құрметке разылығын білдірді әрі әлеуметтік тұрғыда қолдау білдіріп жатқан аудан басшылығына зор алғыс айтып, батасын берді.
Көкпекті ауданынан Ұлы Отан соғысына 18 мың сарбаз қатысқан. 11 мың жерлесіміз соғыстан аман-есен оралып, бейбіт күнде еліміздің болашағын қалады. 9 көкпектілік жауынгер Кеңес Одағының батыры атанды. Жыл өткен сайын қатары сиреп қалған соғыс ардагерлері қандай да болсын құрмет пен тағзымға лайық.

Дархан БРЕДІБЕК

Пікір: