Қазақстан Республикасының Президенті Қ.К.Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты бірінші Жолдауында мәдениет саласында оң өзгерістер жүргізуге ерекше назар аударды. Бұл сала өз алдына ерекше көңіл бөлуді, оның қызметкерлерінің шығармашылық өрлеуін қолдауды, ынта-жігерді, еліміздің мәдени және рухани әлеуетін дамытуды талап етеді. Барлық уақытта мәдениет қоғамда біріктіруші рөл атқарады.
Көкпекті ауданының мәдениеті жоспарлы және тұрақты дамып келеді, оған Қ.Алтынбаев атындағы Көкпекті және И.К.Федосов атындағы Самар Мәдениет үйлерінің материалдық-техникалық базасын нығайту және жаңа жабдықтармен қамтамасыз ету бойынша атқарушы билік жұмысының нәтижелілігінің негізгі индикаторлары дәлел.
Ағымдағы жылы мәдениет үйінің көрермендер залдарында LED экрандар орнатылған, мекеме басшылары қызметтік автокөліктермен қамтамасыз етілген, аумақтар абаттандырылған, алдағы жылы әртістердің сахналық киімдерін жаңарту жоспарланып отыр.

Осы уақытқа дейін Самар Мәдениет үйінің өз автокөлігі болған жоқ. Концерттерге әртістер жалға алынған автокөліктермен баруға тура келді. Енді жағдай түбегейлі өзгерді.
29 қазан күні Самар ауылының жұртшылығы И. К. Федосов атындағы мәдениет үйіне жаңа «Газель» көлігінің кілті табысталған сәттің куәсі болды. Жиналғандар алдында аудан әкімінің орынбасары Марат Қапарұлы Теміржанов құттықтау сөз сөйледі:
- Құрметті жерлестер, Мәдениет саласының қызметкерлері, аудан әкімі А.С.Смаиловтың тапсырмасы бойынша Сіздерге «Газель» автокөлігінің кілтін салтанатты түрде табыс етуге рұқсат етіңіздер. Енді сіздер жаңа көлікпен ауыл-ауылдарды аралап, оларға қуанышты көңіл-күй сыйлауға мүмкіндіктеріңіз туды. Баршаңызға зор денсаулық және барлық жер бетіндегі жақсылықтарды тілеймін, - деп атап өтті Марат Қапарұлы.
«Көкпекті ауданының Құрметті азаматы» Баянды Кәкенұлы Қожамбетов Самар өңірінің мәдениет саласына назар аударғаны үшін аудан басшылығына алғысын білдірсе, Самар Мәдениет үйінің қызметкерлері де өз ризашылықтарын жасырмады.
Жыл жылжып, дәуір алмасса да ұлттық мәдениет дәстүрлер мен халық шығармашылығында ғана емес, сонымен қатар қазіргі заманғы өнерде де өмір сүреді. Ол дарынды, жан-жақты және өнерді сүйетін жандардың арқасында өміршеңдігін жоғалтпайды.
Енді И.К.Федосов мәдениет үйінің әртістері бұрынғыдан да үлкен ынта-жігермен, өз шығармашылық қабілеттерін шыңдап, ауылдық округтердің тұрғындары үшін мәдениеттің алтын көпір болу, достық және жоғары мәдени ортаны қалыптастыруға үлкен үлес атқаруды жалғастыра бермек.
Клара Қабдылашымқызы Нұрпейісова, Самар ауылындағы «Асыл қазына» этно-фольклорлық ансамблінің жетекшісі:
- Ауылымызда біз ұзақ жылдар күткен қуанышты оқиға болды. Аудан әкімі Асхат Сайдахметұлымен бірінші кездесуде біздің ансамбль Мәдениет үйі үшін көлік беру туралы өтініш білдірді. Ауданның ауылдық округтеріне концерттермен барып, мәдени ақпарат алмасуды, рухани жақындасуды өткізу үшін бізге автокөліктің қажеттілігі кезек күттірмес мәселе болған еді. Енді біздің өтінішіміз қанағаттандырылды, ауыл мәдениетін дамытуға қолдау білдіргені үшін Асхат Сайдахметұлына алғысымызды білдіреміз. Баршаңызға денсаулық, бақыт, бейбіт елде ашық аспан тілеймін.

Пікір: